Gratë, ndryshe nga burrat kalojnë nëpër disa faza të cilat bëhen të rrezikshme për shendetin e tyre. Mjafton të përmendim ciklin menstrual, shtatzëninë apo menopauzën. Të gjitha këto faza që kalon një grua kërkojnë një kujdes të madh, veçanërisht kur bëhet fjalë për mënyrën e të ushqyerit. Dietologia Blerina Bombaj na tregon se cilat 7 ushqimet që duhet të hajë çdo grua. Gjithashtu, jep edhe një shembull të një menuje ditore që mund të ndiqni
Të jesh grua ka pa dyshim privilegje, një ndër to është edhe ai i jetëgjatësisë. Një grua jeton mesatarisht 5-7 vite më shumë se një burrë. Megjithatë, jeta e një gruaje bëhet mjaft e vështirë pas menopauzes dhe shendeti i saj vihet më shumë në rrezik në sajë të ndryshimeve hormonale drastike që ajo pëson.
Me mbarimin e femijerise, nje vajzë ka disa nevoja të ndryshme nga një djalë në lidhje me shëndetin e saj. Gjatë moshës që ajo i nënshtrohet ciklit të përmuajshëm menstrual, nevojat e saj janë më të rritura në hekur, ndërsa pas menopauzës, kalciumi bëhet elementi parësor për parandalimin e një prej sëmundjeve më të përhapura te femrat – osteoporozës. Le t’i hedhim një sy ushqimeve më të rëndësishme që një grua duhet të konsumojë, veçanërisht pas te 40-
ave.
1. Qumeshti i dhisë dhe kosi i shtëpisë (1-2 racione ne ditë)
Qumështi i dhisë është i pasur në kalcium dhe ka më pak yndyrë nga qumështi i zakonshëm. Është më i tolerueshëm dhe nëse dhitë kullosin në hapësira të gjelbra, qumështi i tyre përmban edhe acide lyrore omega 3 – mjaft të rëndësishme për mbrojtjen e zemrës. Kosi i shtëpisë, përveç se është një burim gjithashtu i mire i kalciumit, ofron edhe probiotikë të cilët duket se luajnë një rol shumë më të rëndësishëm nga sa kemi menduar deri me sot në shëndetin tonë. Ai është i lidhur me mirëqënien e baktereve miqësore që bashkëjetojnë me ne duke përbërë një element kyç të imunitetit që fillon në aparatin tretës.
2. Vaji i ullirit ekstra i virgjër (6-9 lugë të mëdha në ditë)
Vaji i ullirit luan rol mbrojtës kundër kancerit të gjirit. Në sajë të antioksidantëve të jashtëzakonshëm që përmban, vaji i ullirit ndikon në parandalimin e sëmundjeve të zemrës, të osteoporozës dhe Alzheimerit. Për më tepër, vetitë antimikrobiale të bifenoleve, ndikojnë ndjeshëm edhe shëndetin e aparatit tretës. Kujdes, bëhet fjalë për vajin e ullirit ekstra të virgjër, të presuar në të ftohtë.
3. Fasulet (150gr/jave)
Fasulet dhe veçanërisht thjerrëzat, janë ushqime me forcë të jashtëzakonshme mbrojtëse kundër kancerit të gjirit. Fasulet mund të luajnë rol stabilizues në hormone femërore. Fibrat që gjenden të fasulet ndihmojnë në uljen e kolesterolit ndërsa isoflavonet – antioksidantë tipike te fasuleve, qetësojne simptomat e para ciklit dhe menopauzës. Fasulet janë të pasura në acid folik, një vitamine e pazëvendësueshme për gratë që planifikojnë të mbeten shtatzënë.
4. Sardelet & peshqit e kaltër (300 gr/javë)
Peshqit e kaltër të vegjël që mund të konsumohen me hala, ofrojnë minerale në proporcione perfekte për të mirëmbajtur kockat. Njëkohësisht ofrojne Jod, një element i domosdoshëm për funksionin e gjendrës tiroide e cila kontrollon gjithë metabolizmin dhe vitalitetin.
5. Karkalecat (100 gr/javë)
Karkalecat janë një burim i mirë i proteinave, yndyrnave omega 3, por veçanërisht i një antioksidanti që gjendet ekskluzivisht të to – astaksanthinës. Ky antioksidant ka forcë të jashtëzakonshme neutralizuese për radikalet e lira dhe është gjetur të ketë efekt mbrojtës kundër kancerit. Çdo qelizë e organizmit tonë mund të përfitojë nga astaksanthina. Ajo çka e bën tepër të rëndesishëm këtë substancë është efekti i dukshëm kundër plakjes dhe pro jetëgjatësisë.
6. Frutat e pyllit & shegët (400 gr/jave)
Boronicat, manaferrat, mjedra, rrushi i kuq, shegët dhe luleshtrydhet janë ndër frutat më të çmuar që përmirësojnë shëndetin e aparatit urinar, rrisin përqëndrimin dhe luftojnë plakjen. Të pasura në vitaminë C dhe acid folik, frutat e pyllit garantojnë shtatzani të mbarë për gruan dhe shëndet të syve dhe lëkurës së saj. Ato duhet të jenë pjese e pandarë e menusë javore të një gruaje, krahas frutave të tjera që përfaqësojnë lëndë ushqyese të ndryshme.
7. Rukola (2-3 kupa/jave)
Si nje zarzavat i familjes se kryqëzoreve ku ben pjesë edhe brokoli, rukola është një ushqim i përsosur. Ajo përmban minerale në sasi të konsiderueshme dhe sulforafane te cilat njihen si molekula antikanceroze. E pasur ne vitamin K, rukola ndihmon në përthithjen e kalciumit dhe shëndetin e kockave.
Pije te dobishme – Çaji jeshil dhe kurkuma (2 kupa në ditë)
Çaji jeshil mund të renditet ndër aleatet më të devotshëm të shëndetit të gruas. Ai lidhet me ulje të rrezikut të kancerit të gjirit dhe ofron forcë antioksiduese si rrallë ushqim tjetër. Në kombinim me një ndër erzëat më antiinflamatore – siç është kurkuma, një çaj jeshil mund të konsiderohet një thesar.
Suplemente te dobishme per gruan ne menopause
Vaji i melçise së merlucit: një burim i shkëlqyer i vitaminës D e cila mbron nga osteoporoza, kanceri dhe diabeti, si dhe një eliksir kundër plakjes.
Vaji i karkalecit të kuq: njësoj sikurse karkaleci i kuq, ky supplement përmban antioksidantin astaksanthinë i cili ndër të tjera duket të ketë ndikim pozitiv në uljen e treglicerideve gjithashtu.
Kalciumi: ndër të paktët suplemente të vertetuar bindshëm për efektet pozitive kundër kancerit të zorres së trashë, hipertensionit dhe osteoporozës.
Shembull i ushqimit ditor
Mengjes: 1 gotë qumësht dhie ose 200ml kos shtëpie, 50gr fruta pylli të freskëta ose 20 gr të thara, 1 lugë të vogël fara lini, 1/2 banane
Paradite: 1 çaj jeshil me kurkume, 1 mollë jeshile
Dreke: Sallata- sallatë jeshile, rukola, 1-2 lugë elb i zier, agjinare konservë*, djathë të njomë dhie, uthull molle dhe vaj ulliri; Pjata kryesore – 150gr sardele të vogla të pjekura në salce domatesh, 2-3 patate të vogla të ziera me lëkurë, të marinuara me vaj ulliri dhe limon
Pasdite: 1 çaj jeshil me kurkume, 1 arrë Brazili
Darke: 1 omeletë me spinaq, spec të kuq dhe tërshërë të zbutur më parë; 1 supë me kërpudha** dhe qiqra, 90gr karkaleca të pjekur
Para gjumit: 1/2 gotë qumësht dhie të ngrohtë, 1 fetë bukë thekre, 1/2 banane
